Cwestiynau Cyffredin

Beth yw diben y safle hwn?
Diben y safle hwn yw ei gwneud mor hawdd â phosibl i chi gael tai gwag yn eich ardal yn ôl mewn defnydd. Mae’n gwneud cynghorau’n atebol am ymateb i’r tai gwag rydych chi’n rhoi gwybod amdanynt, ac am ddelio â nhw.
Sut ydw i’n defnyddio’r safle?
Rhowch god post neu gyfeiriad yn y blwch ar y dudalen hafan ac fe gyflwynir map o’r ardal honno i chi. Cliciwch ar y man lle mae’r eiddo gwag, llenwch y manylion, llwythwch ffotograff i fyny os oes un gennych a phwyswch anfon. A dyna’r cyfan.
A yw’r gwasanaeth ar gael am ddim?
Ydy. Talwyd am gostau datblygu a chynnal y safle hwn gan yr Asiantaeth Tai Gwag a Shelter Cymru drwy haelioni eu cyllidwyr. Mae'r Asiantaeth Tai Gwag a Shelter Cymru yn elusennau cofrestredig, felly os ydych yn credu yn ein nodau a hoffech gyfrannu, mae croeso i chi wneud hynny. Asiantaeth Tai Gwag / Shelter Cymru.
Ydych chi’n cael gwared ar gynnwys gwirion neu anghyfreithlon?
Rydym yn cadw’r hawl i ddileu unrhyw adroddiadau neu ddiweddariadau yr ydym yn eu hystyried yn amhriodol.
Sut mae cynghorau’n dod ag eiddo gwag yn ôl mewn defnydd?

Mae gan bob cyngor yng Nghymru a Lloegr bwerau i ddod â thai gwag yn ôl mewn defnydd. Mae llawer ohonynt yn dda iawn wrth wneud hynny, nid yw rhai eraill. Mae’r rhan fwyaf o gynghorau’n ceisio helpu a dwyn perswâd ar y perchennog i ddod â’u heiddo yn ôl mewn defnydd; dim ond pan fydd help a pherswâd wedi methu y byddant yn defnyddio pwerau cyfreithiol fel Gorchmynion Rheoli Anheddau Gwag.

Mae’r rhan fwyaf o eiddo gwag yn cael eu dwyn yn ôl mewn defnydd ymhen hir a hwyr gan eu perchennog. Fodd bynnag, mewn achosion niferus, mae hyn yn cymryd blynyddoedd. Yn aml, bydd eiddo gwag yn dirywio’n gyflym – bydd chwyn yn eu goresgyn a bydd y tywydd yn ymosod arnynt. Maent yn aml yn cael eu defnyddio gan sgwatwyr, pobl sy’n tipio’n anghyfreithlon, fandaliaid ac weithiau cânt eu rhoi ar dân yn fwriadol. Mae’r gymdogaeth gyfan yn dioddef wrth aros i’r perchennog ddelio â’i eiddo.

Mae cynghorau’n helpu ac yn dwyn perswâd ar berchenogion i adfer eu heiddo i’w defnyddio yn gyflymach. Hyd yn oed wedyn, gall y broses fod yn araf, yn enwedig os yw’r eiddo mewn cyflwr gwael iawn neu os yw’r perchennog yn amharod i wneud unrhyw beth. Yn y rhan fwyaf o achosion, bydd chwe mis yn mynd heibio cyn y gallwch ddisgwyl gweld unrhyw beth yn newid, weithiau hwy. Nid yw hyn yn golygu nad yw’r cyngor yn gwneud unrhyw beth, a dyma pam rydym ni’n annog y cyngor i ddiweddaru’r wefan fel y gallwch weld beth sy’n digwydd.

Byddwn yn cysylltu â chi ddwywaith (mis a chwe mis ar ôl i chi roi gwybod am yr eiddo gwag), fel y gallwch ddweud wrthym beth sydd wedi digwydd. Os nad yw’r cyngor yn gwneud unrhyw beth, neu os ydych chi’n meddwl bod eu hymateb yn annigonol, byddwn yn rhoi cyngor i chi ar beth i’w wneud nesaf.

Os taw’r llywodraeth neu un o’i hasiantaethau sy’n berchen ar yr eiddo gwag, nid oes gan gynghorau unrhyw bŵer i helpu’n aml. Fodd bynnag, mae’n bosibl y byddwch yn gallu gweithredu’ch hunan yn uniongyrchol gan ddefnyddio PROD: http://www.emptyhomes.com/what-you-can-do-2/resources/prods-2

A fydd adrodd am eiddo gwag yn gwneud unrhyw wahaniaeth?

Bydd. Gall cynghorau wneud gwahaniaeth gwirioneddol, ond mae ganddynt lawer o bethau i’w gwneud. Bydd llawer o gynghorau ddim ond yn delio ag eiddo gwag sydd wedi cael eu hysbysu iddyn nhw. Os nad yw pobl yn rhoi gwybod am eiddo gwag, mae’n bosibl iawn y daw cynghorau i’r casgliad bod meysydd gwaith eraill yn fwy pwysig.

Mae dros 840,000 o dai gwag yn y DU. Mae’r Asiantaeth Tai Gwag yn amcangyfrif bod dros hanner y rhain yn wag heb angen. Effaith hyn yw gostwng sylweddol yn y stoc tai sydd ar gael, gan fwydo argyfwng tai’r DU. Sgil-effaith y gwastraff hwn yw bod llawer mwy o bwysau’n cael ei roi ar dir adeiladau gan fod mwy o dai’n cael eu hadeiladu i ateb y diffyg. Mae’r Asiantaeth Tai Gwag yn amcangyfrif y byddai dod â dim ond chwarter tai gwag y DU yn ôl mewn defnydd yn rhoi cartrefi i 700,000 o bobl, yn arbed 160 cilometr sgwâr o dir ac yn arbed 10 miliwn tunnell fetrig o CO2 dros adeiladu’r un nifer o dai newydd.

Cwestiynau Preifatrwydd

Pwy sy’n cael gweld fy nghyfeiriad e-bost?
Os gwnaethoch gyflwyno eiddo gwag, wrth reswm, mae eich manylion yn cael eu darparu i ni. Ni fyddwn byth yn rhoi nac yn gwerthu eich cyfeiriad e-bost i unrhyw un arall, oni bai ein bod ni’n gorfod gwneud hynny yn ôl y gyfraith.
A fyddwch chi’n anfon negeseuon sbam budr, bwystfilaidd at fy nghyfeiriad e-bost?
Byth. Byddwn yn anfon neges e-bost atoch os yw rhywun yn gadael diweddariad ar adroddiad a wnaed gennych, ac yn anfon holiaduron e-bost atoch chi bedair wythnos a chwe mis wedi i chi gyflwyno problem yn gofyn am ddiweddariad am ei statws; dim ond ynghylch eich problem y byddwn yn anfon negeseuon e-bost atoch chi.

Cwestiynau am y Sefydliad

Pwy adeiladodd y safle hwn?
Adeiladwyd y safle hwn gan mySociety. Mae mySociety yn brosiect elusen gofrestredig sydd wedi tyfu o gymuned o wirfoddolwyr a wnaeth adeiladu safleoedd fel TheyWorkForYou. Prif genhadaeth mySociety yw adeiladu prosiectau ar y Rhyngrwyd sy’n cynnig manteision syml, dirnadwy i bobl yn yr agweddau dinesig a chymunedol ar eu bywydau. Ein prosiect cyntaf oedd WriteToThem, lle gallwch ysgrifennu at eich cynrychiolwyr etholedig, am ddim. Cyfrannu at mySociety
Lle mae’r "cod gwreiddiol" i’r safle hwn?
Y meddalwedd wrth gefn y safle hwn yw cod agored, ac mae ar gael i chi yn bennaf o dan drwydded meddalwedd GNU Affero GPL. Gallwch lawrlwytho’r cod gwreiddiol a’n helpu ni i’w ddatblygu. Mae croeso i chi hefyd ei ddefnyddio yn eich prosiectau eich hunan, er bod rhaid i chi ryddhau’r cod gwreiddiol i unrhyw brosiectau o’r fath.
Pobl sy’n adeiladu pethau, nid sefydliadau. Pwy wnaeth ei adeiladu go iawn?
Ysgrifennwyd yr addasiad hwn o Fix­MyStreet gan Matthew Somerville. Diolch i’r Arolwg Ordnans (am y mapiau, codau post y DU a chyfeiriadau’r DU – data © Hawlfraint y Goron, cedwir pob hawl , Y Weinyddiaeth Gyfiawnder 100037819 2008), Yahoo! am eu llyfrgelloedd JavaScript wedi’u trwyddedu gan BSD, y gymuned meddalwedd am ddim gyfan (daethpwyd â’r prosiect arbennig hwn i chi gan Perl, PostgreSQL, a’r rhif 161.290) ac M247 (sydd mor garedig â gwesteia’n holl weinyddion). Rhowch wybod i ni os ydym wedi hepgor unrhyw un.